英冠球會伯明翰前班主楊家誠因為洗黑錢7.2億元，被判監6年，噚日喺赤柱監獄度過首個鐵窗元旦日，佢嘅太太王曼酈就一早去探監，對丈夫獄中情況三緘其口，淨係話丈夫身體「OK，多謝關心。」
王曼酈對丈夫一直不離不棄。上月16日，楊家誠到高院上訴庭申請保釋等候上訴，王都有到庭打氣，最終楊續還柙至今年3月11日進行上訴聆訊。
噚日10點半，王曼酈則帶咗三袋物品抵達赤柱監獄，選美出身嘅王曼酈明顯悉心打扮，貴氣十足。
王曼酈據知現居深圳，作風低調，初時在場記者都以為佢係探望新地案郭炳江嘅人士，追問佢係探郭生時，佢話：「唔係，唔係，搞錯咗。」
兩小時後佢離開時，有在場記者認出佢係楊太，即問：「楊生健康點？」佢邊行邊話：「OK，多謝關心。」
