今年11月就係區議會選舉，各大黨派都幾乎各就各位，而公民黨實行精兵制，只派少於30人出戰。上屆連任中西區山頂選區失敗嘅陳淑莊Tanya，雖然唔喺黨嘅區選作戰名單上，但原來該黨有個「徵召」制度，若然有需要，黨就會即call即選，Tanya隨時被徵召上戰場作戰，選完區選再戰超級區議會選舉。
余若薇、梁家傑、負責該黨選舉策略嘅秘書長賴仁彪，噚日同四位青年公民齊齊同傳媒茶敍，話題離不開今年區選。該黨上屆派出41人參選，今屆則擬派出少於30人出戰，原來係想實行精兵制，望谷高成功率。該黨又會向未必想入黨、但同屬民主派嘅有意參選人士傳授選舉經驗，延續雨傘運動。
上屆區選，公民黨焦點落喺再戰山頂選區嘅「人氣王」陳淑莊身上，但Tanya最終落敗，人人都睇住佢今屆係咪捲土重來。賴仁彪話Tanya現時未喺黨嘅遴選名單上，但公民黨有個制度叫做「徵召」，若果黨員係「被時代選中嘅參選人」，呼聲甚高，即使之前冇話過選，都可能突然被徵召，即call即選。
梁家傑有意交棒
咁Tanya係咪想選先？病到九彩嘅Tanya呢排瞓到天昏地暗，對於有可能被徵召，佢即時彈起回應，話真係未有準備參選，因為區選唔係只論人氣，地區工作好緊要。至於立法會選舉，黨魁梁家傑噚日都話有意退下來，話一個人喺一個位置太長冇意思，加上雨傘運動已證明，應交棒畀年輕一代。
李八方
mailto:[email protected]