跑大賽點可能冇大摩份，上屆華商會盃大摩四路興兵，結果贏「綽力之城」兼以「卡達聖」包辦馬房Q，今年元旦日第九場又跑華商會盃1400米三級賽，大摩出夠四駒成功衛冕，半冷門8.8倍「駿馬名駒」配郭能後上甚勁，最後一步力壓外號「馬場王菀之」的陳穎怡愛駒「隨心隨意」，以短馬頭位之先掄元。二至四名「隨心隨意」、「美麗之星」及「勁勢」，分別屬於葉廐、東廐及蔡廐，大摩雖衛冕卻冇得食Ｑ。
「駿馬名駒」之前最高贏過一班賽，分級賽最叻第四，上仗國際賽日一班千四米由布文客串跑第三，今場復用不敗配搭郭能，留到最後100米從外欄以勁勢冚過中檔之「隨心隨意」同內欄的「美麗之星」，首勝分級賽，郭能亦告連勝四個賽日，由2014贏到2015年。
「駿馬名駒」累積八捷，計埋今場已經連續三年元旦日建功，堪稱1月1日之星。至於「隨心隨意」贏完1600米其士盃轉1400米，可惜影相僅敗做阿二，連續兩屆華商會盃跑位置贏唔到，賽後「隨心隨意」騎師韋達亦面燶燶。