新年伊始，心念亞視，話晒堂堂全球第一個華語電視台，由麗的到老邱亞洲再到林伯亞洲然後轉咗唔知幾手到𠵱家亞洲，屹立獅子山下半世紀，畀無記打極都唔死，兼自稱「香港良心」美名，冇功都有勞，即使未受萬人愛戴，都不應破落至千夫所指，無良僱主處處有，佔中都三個月先清場，𠵱家不過畀遲一頭半個月糧就話拉人封艇，市民明顯厚此薄彼，未免涼薄，幸有張局長明鏡高懸，一句「未有足夠證據告亞視欠薪」，簡直平地一聲雷！勞工法例列明欠薪七日就告得，如今新年已至，十一月先出半份「袋住先」，明顯與政府同聲同氣，十二月份糧仍未有着落，七百幾員工齊齊變義工，規模大過樂善堂，所以，先例已開，從今老闆欠薪未夠三月，一律冇事，條法例就當粉筆字咁抹咗佢！（但各位小朋友緊記，到你用粉筆畫公仔寫字時此話就不適用，記住，原來龍門是有轆的。）
靠破格殺出新血路
明明冇糧出，窮到連記招支咪都可以冇聲，但亞記高層竟然宣佈推出新節目《我們亞視這一家》，據悉內容屬真人騷，上至高層下至清潔阿嬸都現身說法，大吐苦水。巧婦難為無米炊，冇糧出被迫做義工不特止仲兼埋出鏡？又何苦呢！即刻又想起以前在亞記日子主持過「亞視怎麼辦」節目，由觀眾來電與演員及管理層直接對話，並非新意，但勝在夠pop。回想昔日麗的到亞洲時有佳作，往往以小勝大，全憑缸瓦撼瓷器，人做我唔做，殺出新血路。我話晒A記出身，唔忍心睇佢瞓低，甘心免費獻計，務求力挽狂瀾。
首先，HKTV發牌無期，全歸功於一男子，投桃報李，理所當然，梁家有女初長成，開到口開埋心口晒北半球無非恨入行，就一於力捧其千金，由清談節目真人騷到劇集，套套擔正主打，包有睇頭，而且勝在唔使出糧，以打破官商勾結之嫌。真人騷節目：「齊昕父母親」，由個女集集質自己老竇老母，爆家醜，唱反調，我同你賭，收視一定強過無綫台慶；清談節目：既然亞視有摩登媒人講男女經都做得節目，一於由齊昕夥拍同樣「齊陰」的八両金，大談兩性秘聞，包你點都好過睇「高志森微博」、「把酒當歌」（唉……提起都眼瞓ZZZZ）至於劇集，當然拍亞視最煞食之武俠劇，一於邀請各曾經幫過亞視講好說話的建制派議員粉墨登場，眾志成城。頭炮古裝武俠劇：「齊陰、癡根、掌厲雲」故事講一齊（齊陰師太）、雙癡（癡身、癡根，由tree-gun一人分飾兩角，不作他人想）、三絕掌之間的恩怨情仇（由亞視老牌演員陳麗雲情商飾演，官民crossover）包你亞視起死回生！
【一言棠】
撰文：歐錦棠
除表演藝術，也酷愛文字、影像及武術，其文章往往一針見血。
本欄逢周五刊登