新年快樂！首先Lulu喺度祝大家新年進步，人人身體健康，大家支持嘅球隊都有好成績。每年新年第一個必睇賽事，當然係英足盃！ 好睇嘅原因唔係在於連場大戰，而係啱啱相反，就算有好多強弱懸殊嘅對決，但每每都會出現叫人意想不到嘅賽果。好似前年韋根咁，就算打護級戰，都可以贏曼城一樣。
早排有個網民「PM」我，只節錄一小段：「小弟我係一個應屆DSE考生，成績好差，可以話入U無望，身上亦都帶住好多唔同人對我嘅期望。好驚佢哋接受唔到我係一個弱者，唔識讀書、唔識孝順、唔識畀安全感女朋友。有時自己努力完一番，結果都係得唔到欣賞，慢慢自己好似對這種失落感覺麻木了……雖然好灰，但我其實好唔想認輸、好唔想放棄，成日諗住仲會有人明白我係有畀心機去做。 」
侯城狀態頹難爆冷
其實我好想同呢位朋友講，做人同踢波一樣，只要你肯上場唔放棄，就一定有機會贏。就好似我最敬重嘅領隊雲格（圖），教名古屋八鯨嗰時，好多人都覺得荷蘭名宿告魯夫絕對比雲格更有能力成為阿仙奴領隊。不過咁多年之後，雲格成功用冠軍去證明自己嘅能力。第一季已經帶領阿仙奴成為聯賽第3，自此更加未跌出過英超前4位。
所以，呢位網友你千祈唔好放棄，就算有人批評你，或者你暫時做得唔好，都要沉着應戰，喺新一年爆個冷，攞好成績畀人睇。不過，今個星期阿仙奴對「老虎」侯城嘅英足盃，就一定唔會爆冷，因為阿仙奴同侯城狀態實在差太遠，唔會好似上年決賽踢得咁緊湊，相信兵工廠可以輕輕鬆鬆贏2:0！
LULU
不懂踢波愛睇波