容祖兒前晚到尖沙嘴出席除夕倒數，剛由美國登台返港的她，對於被新城高層朱明銳豎中指捽鼻暗寸缺席上周五的《勁爆》頒獎禮，祖兒句句到肉地回敬銳哥：「我都唔知我咁值得人重視，相信佢當晚飲大咗，我只係覺得如果長輩飲多咗，就唔好做訪問喇，有時飲大咗控制唔到自己，唔通我同長輩計較咩！」
問祖兒會否親自搵銳哥傾？她推搪說：「唔會喇，以銳哥嘅身份，應該係吳雨大哥（英皇CEO）搵佢先至啱。我好尊重銳哥係我前輩，但呢次拉斯維加斯演出真係好難得，以台上滿足感而言，好難用獎座去比較，希望銳哥稍安毋躁。」再問會否向英皇要求度期出席下年度《勁爆》？祖兒竟無面畀說：「都唔會啦，公司安排我做嘢都係深思熟慮，如果獎係值得畀我，自然會畀啦。」
稱要學鄧紫棋耍大牌
祖兒因沒有現身《勁爆》而冇獎，反而G.E.M.（鄧紫棋）冇新歌卻擸4獎，祖兒則說：「𠵱家係新世代，新準則同新規則，我都要與時並進。」對於G.E.M.耍大牌兼遲到講大話，對此祖兒笑說：「咁我都要耍吓啦！佢都係年紀細，呢行要學做事，我都係不停錯，先至成為今日嘅我囉。」
此外，祖兒昨到伊館出席活動，有相士預測她和男友劉浩龍今年會結婚，祖兒沒好氣說：「呢啲咁正經冇思量過，亦都冇商量過，暫時唔會，𠵱家相處開心愉快，保持現狀就得。」
採訪：盧妹
攝影：仇志德