上次接受鳳凰衞視訪問時，愛港之聲召集人高達斌突然澳門崔世安上身，用騎呢普通話回應記者提問，經《蘋果動新聞》報道後，即被逾十萬網民嘲笑。噚日佢接受《蘋果》訪問時，即刻第一時間主動同記者講：「你哋係《蘋果》吓嘛？我唔使用普通話講吖嘛？哈哈哈！」，自稱唔介意被網民嘲笑，更認為事件有助澄清佢無如外界流傳咁「收中央錢做事」，「我啲普通話咁渣，人哋（中央官員）都聽唔明我講乜嘢啦！」
高達斌其後更指，「包小三」嘅人先會學普通話，所以自己一定無「包小三」啦，講完自己都即刻笑，又話自己嘅英文程度都係同普通話咁上下。
八方見識過高達斌嘅「崔世安式」普通話後，唔只相信佢無包小三，仲覺得佢嘅普通話同英文口語程度，可能都未及小三喎。