隔牆有耳：
長毛被外傭「集郵」 - 李八方

社民連立法會議員「長毛」梁國雄年中無休，噚日元旦假期都繼續抗爭，由中環匯豐總遊行到禮賓府幫狼英「開年」，要求狼英落台。由於噚日係公眾假期，匯豐總行一帶如常成為菲律賓女傭「佔領區」，令長毛同班戰友想搵位擺低幅橫額都有困難，最終長毛成功向女傭成功借位不特止，一班女傭仲即時瘋狂捉住長毛，輪流要求合照集郵，長毛來者不拒之餘仲祝班女傭「Happy New Year」，搞到呢班外籍粉絲好happy。

其實長毛噚日除咗遊行去禮賓府要求狼振英下台，之後仲去咗聲援黨友阿牛曾健成喺海富「快閃」掛普選橫額。其實佢喺前晚除夕同朋友慶祝期間，一收到市民電話求助，就立即趕去添馬公園同連儂牆，跟進懷疑被警方無理拘捕嘅市民。