去年A股失驚無神爆上，以內地股市大癲大肺性格，趣怪嘢咁多，本欄列出七宗最趣事，以作回顧。內地咁多年慣例，股市當年大升後，下一年唔係大升就係大跌，相信今年市況必然更加精彩，好戲連場。
1.券商年初全部睇錯市。連睇得最好嘅國泰君安都只係估滬指最多升20%。
2.睇得最準嘅，竟然係阿爺最高智囊社科院。之前幾年都睇淡，去年初卻話，可能有「5.19行情」，重複1999年5月，兩個月內升七成嘅神話。社科院又話，今年會升到5000點，你信唔信？
3.就算冇基本因素，券商9月轉軚，國泰君安話滬指會升到5000點，話係「黨給我智慧」，信者得救。
4.自1996年以來，每逢王菲情路有進展，A股就爆升。舊年9月鋒菲驚世復合，被稱為呢輪A股大升嘅「核動力」。
5.由2007年起，每逢有媒體提到「滬指萬點」，股市必冧。有內地財演喺12月9日A股大跌前再提，結果被鬧爆。
6.獐子島8億元扇貝全部消失，業績由有盈利變為巨虧，成為經典。
7.創興資源喺上交所公告爆粗，話公司「被小人暗算」，成另一經典。
李可強