正生書院日前舉行「正生2014家聚聯婚慈善晚宴」，邀請約150名學生同佢哋嘅其家人一齊出席，其間播放正生2014年十大新聞回顧短片，八方除咗發現佢哋體育表現非常出色，仲發現一個搞笑位。
事緣有正生同學要參加名為「百萬游」嘅比賽，由於校舍位處嘅芝麻灣風高浪急，唔適合練習，所以學生「靈活變通」，喺一個大約一米乘一米嘅儲水缸中練水，但係練習期間，泳手需要同學協助，先捉緊小腿，再練習划水同呼吸等技巧，望落都幾搞笑。
而平日鍾意着牛記笠記嘅校監林希聖，當晚一着西裝就被同學笑佢：「嘩，做乜咁似山口組（頭目）。」林校監不甘示弱反駁話：「呢度集齊香港所有堂會啦！」佢話好欣慰學員努力改過，笑言正生應該改名「笑口組」至真。