年尾流流，警察還是要挑釁市民。
我用粉筆畫畫，告我刑事毀壞；通街有人貼「包醫性病」、「通渠」分類小廣告，那應該是恐怖組織了。
我用粉筆畫畫破壞公物，犯法要拉，認命，但阿sir，使唔使call咁多人嚟增援啊？又使唔使封鎖現場啊？不如call埋SDU？老老實實，我可唔可以告警察「浪費警力」？
警察不愧為慈母，唔打你唔鬧你，只係「保護」你，替我申請兒童保護令，要求判我入兒童院。
阿sir，唔好玩啦，一陣入咗兒童院，左邊個阿姐話自己衰打交，右邊個阿姐話自己衰吸毒，然後問我衰乜入嚟兒童院；如果我話衰用粉筆畫畫，佢地一定會以為我揶揄佢地。不如話我枝粉筆係用白粉做嘅，咁樣入兒童院嘅合理性會較高。
但我又唔明係點判㗎呢？我老豆已經講明佢會照顧我，點解你仲要同意我入兒童院呢？你話我老豆聽障所以無力照顧我？我想請問，你係咪有視障，還是你智障？我老豆無能力咁點樣養到我14歲咁大呢？家陣係咪歧視聽障人士？市民講乜個政府都唔聽，會唔會D官有聽障呢？
終於有人幫我上訴，等我可以保釋外出，同屋企人過2015年，但我又唔明白，點解又要判我「宵禁」呢？我做咗乜嘢嚴重犯罪行為要「宵禁」？CY個女都唔使「宵禁」啦，當日你又唔判曾灶財「宵禁」或者終身監禁？
唔通粉筆計雨傘同口罩之後，正式成為香港的大殺傷力武器？
我明嘅，如果我寫「沒法解釋怎可報盡慈母恩」，或者畫一隻張開羽翼保護孤雛嘅禿鷹，政府會頒個大紫荊畀我。
成日話「好似粉筆字咁抹咗去」，我終於明白，香港的公平正義，真係已經好似粉筆字，抹咗去了。