「銀河艦隊」皇家馬德里輸波？以2:4輸咗畀AC米蘭！咁大鑊？個22連勝唔係就咁斷咗啩？皇馬球迷唔使擔心，個紀錄係唔計友賽嘅，所以呢場贏輸都無傷大雅。
C朗擔正照負A米
星期二喺阿聯酋舉行嘅杜拜挑戰盃，由皇馬對A米，一聽個名就知係中東班酋長同油王搞嘅表演賽，而兩隊當然係為咗戲金而嚟。據報收咗主辦單位成400萬歐元（約3,800萬港元）嘅皇馬都好識做，派基斯坦奴朗拿度（C朗）踢正選，但其他擔正隊友就係二線兵。24分鐘，皇馬後衞拿祖費南迪斯回傳送禮，文尼斯單刀破門，幫AC開紀錄；7分鐘後，艾沙拉維幫A米整多粒。C朗都要做吓嘢嘅，35分鐘幫皇馬追成1:2完半場。皇馬下半場換走C朗等大半隊正選，由加里夫巴利同卡斯拿斯等入替，結果俾A米嘅艾沙拉維同柏仙尼各入一球；皇馬要到尾段博到12碼，由賓施馬操刀射入先追成2:4完場。
華倫、馬體會做攔路虎
大家都知，皇馬已經累積22連勝，挑戰緊巴甲球會哥列迪巴24連勝嘅世界紀錄。呢場輸咗，會唔會就咁功虧一簣？答案係唔會，因為連勝紀錄只係計正式比賽。皇馬喺新一年贏多3場，就可以破紀錄喇，不過佢哋嚟緊3場波都唔易踢，下周日西甲先對華倫西亞，下周三西盃仲要作客馬德里體育會，如果一切順利，贏埋下周六對愛斯賓奴場聯賽就會破紀錄。
對於今場輸波，安察洛堤梗係冇所謂啦，因為皇馬今季踢友賽都慣咗揸流攤（見附表）。安帥話：「輸波對我哋完全冇壞影響，我哋仲有一星期備戰，見球員體能都唔錯。呢場波嘅目的係等大家放完假後，適應番比賽節奏。」近日有傳媒爆料，指巴利可能轉會曼聯，皇馬上下就齊齊澄清，指報道子虛烏有；其中巴利話好鍾意馬德里，冇諗過走人之餘仲想續約㖭！
識睇，一定係睇足英台【英波Live】：
http://soccer.appledaily.com
http://bit.ly/engballlive