亞視終於名副其實成為「ATV焦點」，也真正實現「過百萬人睇亞視」，睇亞視究竟幾時出糧。結果亞視股東又使出「袋住先」策略，出糧出一半先，要員工袋住先，連新聞也要播住一半先。
個肺，對，亞視員工的怒氣也只能講一半。老母。
亞視拖糧成為史上最完美的騙局。
首先，拖你糧超過30日，理論上僱傭合約便要中止；但如果新聞部員工真的中止合約不報新聞，根據條例，電視台無新聞便違規便要釘牌等於執笠，股東更加不會向一艘沉船注資，結論是員工無糧出。
好啦你話員工向勞工處求助，張建宗在亞視員工已經見晒報喊晒口個戶口得番7個幾銀紙的情況下，仍然可以擘大眼話「如果有足夠證據亞視拖糧便會採取法律行動」。
等於說，小朋友，我勞工處幫唔到你㗎，亞視拖糧係政治事件，我只會拉嗰D欠薪一千幾百的無良僱主，呢D一拖就成2個月仲要一千五百萬的大數目，我都係返去再搜集證據先。
亞視拖糧，勞工處拖告。
竊鉤者誅，竊國者侯。勞工處虛偽無能，員工繼續無糧出。
亞視拖糧，劍指政府：你不續牌我搵唔到白武士，你不續牌我也不會出糧。
如果689屈服續牌，則以後每次續牌前夕都拖糧，最多一拍兩散。
通訊事務局因為亞視管理層的混亂而建議不續牌，但管理層卻以更混帳的表現逼政府續牌。
亞視話將減少自製節目，但是，亞視仲有自製節目咩？已經日日「我和方太生活廣場有個約會」經典重溫，所以對於王征話已經投資20億喺亞視，真係好懷疑，日日播經典劇再搵幾個主持飲住紅酒吹水或者搞一個觀眾走晒嘅台慶，居然要20億？難道都花在請跳騎馬舞的dancers？