大家最熟悉嘅香港歌手馬主，當然係郭富城啦，佢一直歌運亨通，但今季馬運就麻麻咯，「愛的呼喚」成日搏輸得個近字；另一位歌手馬主，年紀比城城大又冇城城咁靚仔嘅張明敏，養馬運亦五十步笑百步，佢隻「中國動力」已跨季13仗未勝，隻馬將喺元旦日出賽，張明敏當然希望愛駒勝出，為佢嘅新專輯《我的中國夢》造勢！
大家都知張明敏外號愛國歌手，喺家陣嘅政治氣候，《我的中國夢》呢類維穩歌，老老實實香港嘅後生仔，應該冇乜興趣聽！但佢隻「中國動力」馬迷或者有興趣博吓冷門，隻馬雖然好耐未贏過，但季初曾經輸畀楊千嬅愛駒「野孩子」唔遠得季軍，反映狀態根本唔差，家陣只評43分，比對上一次贏馬時已低咗10分，馬壇神童蔡明紹將連續第三次策騎，如果覺得冇機會，一早就放棄啦！中國夢都係留番畀習總發，香港人有興趣嘅始終都係橫財夢！