廖偉雄（燦神）、《蘋果動新聞》動主播斌斌、仙樂都、性女Vienna和細Yo伍淑怡噚日喺油麻地綵排，為聽日一連三場嘅演笑會做最後準備。飾演表表李嘅動主播斌斌，唔單止同燦神同台演出，兼且仲會合唱《蘭花草》，仙樂都同埋Vienna就會合唱《色香味》，馮仁昭有幸率先聽咗佢哋啲歌，斌斌同燦神嘅演出梗係合格，反而嗰三個女仔啲歌藝認真麻麻，好彩佢哋大晒性感本錢，勉強搭夠！
越失敗越成功
唔知係咪有舞台經驗，所以斌斌冇怯場，佢仲話：「燦神好好人，排嗰陣冇鬧過我，淨係叫我放啲。佢仲教我唔好怕失敗，因為越多失敗即係越接近成功。」燦神亦禮尚往來讚斌斌表現好，仲話自己冇教路：「教唔到，做戲係越教越衰。我會同佢哋玩吓，今次呢個騷都係畀個平台大家，好多人喺演藝圈努力咗好耐，不過冇機會，完咗之後就睇佢哋自己技巧。」講到咁，不如做埋經理人幫吓啲後輩喇，點知燦神話自己唔適合做經理人：「我淨係要求佢哋好彩成名之後，我吹雞佢哋返嚟幫我嗰陣，收我平啲。」
另外，燦神亦有講到亞視面臨執笠，佢鬧爆話係啲領導人嘅思想問題：「亞視唔會死㗎，亞視啲藝員係一定會同你fight到返嚟，冇人想喺咁惡劣嘅地方做嘢，三千精兵好過三十萬大軍呀！」
撰文：馮仁昭