香港飛馬團體的「點解」，今期賽事將轉投蘇保羅馬房初出，爭第四場四班1200米，如果成功報捷，屆時凱旋門可能一次過出現四位美人。點解咁講呢？邊四位呢？就係梁芷珊、黃婉曼、Giselle及息影藝人吳雪雯。事關梁芷珊係香港飛馬團體成員，而另外三位嘅丈夫馮柏基、鄧振豪及楊耀宗，亦係「點解」嘅馬主，其中大家可能幫襯過鄧振豪，佢就係著名拉麵店豚王嘅老闆。
自從「永不回望」後，前馬王「軍事出擊」馬主梁芷珊，今季再與蘇保羅合作，團體馬「競技英雄」日前落飛得手，轉蘇廐初出即勝，搞到梁芷珊鬼咁開心，佢大讚蘇保羅份人好Nice好易話為，同馬主有商有量，肯多作嘗試，好似「競技英雄」，上季處於低潮，梁芷珊觀察後，覺得隻馬現階段跑一哩末段常唔夠力，因此建議縮程跑1400米，結果蘇保羅真係接受意見，否則「競技英雄」未必能夠重開勝門。
至於「點解」能否一如「競技英雄」，轉倉即勝呢？梁芷珊話日前入倉探「點解」，感覺隻馬狀態好fit，而且心情愉快，轉倉後適應得好好。睇番「點解」，至今6戰得1冠3季2殿，全入前四名，肯定忠心有質素，加上今仗強配李寶利兼排4檔，睇嚟四位美人真係有機會一齊拉頭馬！