【ATV告急之 怒插娘家】「香港良心」亞視拖欠員工薪金、續牌凍過水、買家未落實、取消4個新聞節目，700員工前路茫茫面臨遣散打擊，3位在亞視出身、現於影壇獨當一面的舊將眼見娘家步入絕路，杜汶澤聲討亞視做法神憎鬼厭，狠批投資者王征「完成歷史任務」言論冇人性：「𠵱家有人攞支槍指住你，逼你去買電視台咩？」現貴為金像影帝的張家輝和黃秋生都提議王維基買亞視，秋生揶揄：「冇錢出糧仲有牌，咁我都做，無本生意！」
開台57年的亞視，前身麗的當年曾打到無綫要腰斬《輪流轉》劇集，可惜近年亞視積弱成疾一蹶不振，不但拖欠員工薪金，股東王征、黃炳均、蔡衍明拒絕再投資，「白武士」又遲遲未出現，今年續牌更加凍過水。亞視今日起取消4個新聞節目，而無糧出的員工可要求變相遣散，700員工的飯碗隨時被打爛，人心惶惶。出身亞視的杜汶澤前晚接受本報電話訪問，對娘家逐步走向絕路激憤難平，連珠炮發插爆亞視。
94年起在亞視6年的阿澤，憶起當年亞視亦曾經風光：「可能我好彩撞正好多好監製，好似冼志偉第一個搵我做主角拍《九七變色龍》，之後好多機會，好似《我和殭屍有個約會》，嗰陣仲有《我來自潮州》，又好多外援，當時雖然係弱台但大家士氣好，記得《殭屍》我死嗰集有23、4點收視，壯烈犧牲㗎大佬。」
「做法神憎鬼厭」
問會否返亞視幫手？阿澤不屑說：「其實佢去到呢個地步，最緊要出糧畀夥計，你就使人唔使本，最㷫捉人去政府總部跳扭腰舞，做埋啲陰質嘢又唔出糧都黐線，自己屎忽痕去做就算，但係你唔好咁牙擦，你做得老細要出糧畀夥計。」阿澤更點名鬧爆王征：「我最唔滿意佢嗰句，葉家寶話王征透過佢講完成歷史任務，乜叫歷史任務，你𠵱家係做生意，𠵱家有人攞支槍指住你，逼你去買電視台咩？冇本事出糧就唔好叫自己做老細，唔好咁牙擦，𠵱家施捨人呀？人哋有做嘢㗎，你啲節目設計得差，冇人睇純粹創作、主導問題，唔關夥計事，咁講嘢法完全冇人性。員工冇罪，好多精英員工喺無綫跳槽過嚟，林百欣年代對夥計好好，過年利是90年代都成百蚊，嗰時我未紅排幾次隊，博佢唔認得我。」
問有冇計謀救亞視？阿澤說：「冇啦，主導性睇到，做法神憎鬼厭，如《ATV焦點》、《高志森微博》，睇嚟都係鬧佢，雖然好多好員工，但社會現實適者生存，長痛不如短痛，出一半糧算乜意思，借貴利都要出，執之前清咗條數。」
自89年在亞視6年、現貴為金像影帝的張家輝，在電影《賭俠1999》中說：「仆你個街，亞視嚟嘅喂！」成為金句，他昨在電話中說：「我作為舊員工同觀眾，對亞視唔多唔少有一份感情，見到呢個台搞成咁，係好欷歔！你話𠵱家叫我遺棄佢，當然唔想，我覺得最好由王維基買咗亞視，佢本身好有野心同魄力去做電視台，𠵱家只有佢有能力做呢個白武士，如果新買家冇心去做，維持現狀節目重播又重播，唔可能挽回觀眾信心，咁政府續牌畀佢都冇用。」
秋生：冇錢仲有牌？
而82年亞視第一屆訓練班出身的黃秋生昨則在電話寸爆亞視：「如果冇人買冇人注資，作為生意要執，冇錢出糧仲有牌，咁我都做，無本生意，成件事莫明其妙、荒謬！執咗咪鼓勵壟斷，王維基係咪買？不如佢買亞視咪搞掂。」是否不想見到亞視執笠？秋生說：「健康競爭梗係多一兩間電視台最好，冇人睇因為製作唔得。自己唔睇亞視，返去探阿媽，工人開亞視睇到政論節目，主持連廣東話都未講得正，成日雞（基）本法，好搞笑，又播《再向虎山行》係咪時光倒流？作為觀眾睇好難受，寧願選擇悶蛋無綫，所以希望有人注資，王維基節目拍得咁好，有乜問題唔畀牌佢？𠵱家令到無綫越嚟越差，賣啲爛豬肉畀你。」
採訪：比華利、鍾國仁、皓騫
