【ATV告急之正言直諫】亞視前日宣佈先向員工發放11月半份糧暫緩財困，至今仍期待「白武士」蒲頭，令亞視有望起死回生。昨傳出節目《星動亞洲》本周播完存貨便會摺埋，該節目監製潘康健日前接受訪問，力數亞視欠薪風波是社會三大荒謬。
「無綫遲早都執笠」
潘康健於10年加入亞視，他日前在大埔訪問時，揶揄亞視拖欠員工薪金：「第一，政府應該要喺11月30日話你知發定唔發牌，一路拖到今日。第二，老闆好荒謬，可以出半個月糧畀員工，怕大家告到佢清盤，清盤就一定輸晒；其他投資者點會執呢個爛攤子。第三，員工仲荒謬，外界人奇怪你哋冇糧出仲返工，呢樣就只有亞視人先知亞視事。」
不過曾効力過無綫的潘康健，大讚在亞視工作富人情味：「我下面有4個導演、4個助理編劇（PA），人雖然少，但大家會互相幫助，唔似得對台，有好多層好多派系，亞視就冇爭嘅觀念。」潘康健指電視業界沒前景，他更揶揄無綫：「即使係無綫遲早都有一日執笠，𠵱家20至30歲嘅人唔鍾意睇電視，遲多十年，20到40歲嘅人唔睇電視，慣性收視頂得幾耐！」
中吉籤終遇貴人
今日約滿亞視的黃集鋒，與楊正軍昨到黃大仙為亞視求籤祈福，黃集鋒昨撳機結餘剩下0.94元，仍未出糧，他說：「可能我份約就滿，會計等我約滿先一齊計。」他仍希望亞視度過危機：「佢執係香港人損失，期望有電影業人注資，我喺亞視兩年，一日為師，終生為父，好感恩。」楊正軍昨表示已出半份糧，他力撐亞視：「𠵱家出咗半個月，大家士氣好好。」亞視公關部昨回覆所有藝員的11月半份糧陸續過數，黃集鋒都不例外。
此外，黃集鋒為亞視前途求得第64中吉籤「孟之反敗師」，相士李俊樺解說：「問前程𠵱家會反覆啲，係磨練，唔好退縮，最後有貴人扶持。」籤文似暗示即將有白武士打救亞視。黃集鋒同時為自己求了第15上吉籤「明皇遊月殿」，李俊樺勸喻黃集鋒：「唔好成日唔耐煩，畀啲耐性，唔好灰心，提防口舌是非。」
採訪：盧妹、嵐山
攝影：陳志嵐