今年邊齣好戲睇到要掟花生？會唔會係《呢個政改好抵死》？8.31框架下嘅假普選，政改三人組堅持hard sell觀眾袋住先，點會唔睇到發癲？講到導演功力，阿爺自編自導兼自閹嘅《被奪走的2017年（特首普選）》跑贏幾條街，因為呢齣神劇，人與鬼兵與賊，喺反佔中運動現形，相信私煙BB同薑蓉嘅賣力演出，令大家興奮莫名；狼英憑偷袋400萬英鎊演活《禮賓府狼人》一角；狼太多得囡囡齊昕扶一把，將第一夫人演得出神入化。有神聖便有神怪，好易分出勝與敗。事不宜遲，去片！
習總自導扼殺真普選
【最專制導演】
喺內地重鎚棒打大老虎、喺香港卻放生689狼人，到底習大大嘅愛與恨，係點樣劃分？八方同全港市民，肯定都一樣唔會明，但有一樣嘢可以肯肯定，就係國家主席習近平，奪走香港可以喺2017年選特首嘅命運。
查實習近平呢位大導演，過去一年搞咗唔少大龍鳳，鋪排呢齣殺普選好戲。例如4月整場訪滬團，畀泛民北上見人大委員長張德江，但又唔畀帶六四物品嘅長毛入境，根本無意聽取一啲激進泛民意見；到6月終於現形，推出一國兩制白皮書，徹底將高度自治嘅美夢敲碎，試問咁專制嘅阿爺，又點會畀普選出嚟？
直至8.31，全國人大常委會呢個橡皮圖章，被指奉行習近平旨意，唔畀香港2017年選特首。一場佔領運動由此而發，各方有心人為重奪普選權同習大大作戰。
私煙V煞面慰藉狼粉
【最𤓓女主角】
努力減磅加上填詞撐警，令正義聯盟召集人李偲嫣今年由年頭「紅」到年尾；一齣私煙崛起，見證香港興衰騎呢至死。
私煙BB喺今年6月底，突然喺政總紮營絕食，話要譴責新界東北衝突同反佔中，最終嘅收穫卻係瘦咗又V面咗，不時selfie慰粉絲，但網民最記憶猶新嘅，卻係佢發表譴責聲明時，錯將肥佬黎讀咗狼振英。
越戰越騎呢嘅佢7月成立「撐警大聯盟」並任召集人，之後頻頻撐警，包括有份填詞撐警歌《香港生命》；唔啱音嘅神曲，邊播邊被當joke。之後則為反佔中不遺餘力，聽咗無數次生日歌、又去旺角反鳩嗚過，佢嘅同陣營盟友甚至喺撐警活動上襲擊記者，論殺傷力藍絲咪仲勁過黃遮？辳事一籮籮，雅虎香港今年十大政治人物人氣搜尋，難怪私煙BB有份上榜。
狼英弄權「袋袋平安」
【最貪男主角】
自從2012年，有隻狼入主禮賓府，香港人有邊一日，可以輕輕鬆鬆冇辛苦？呢一年，狼英嘅貪婪更加表露無遺。對於搵地起樓，佢寸土不讓，無視新界東北居民嘅訴求，只係滿足自己嘅政治需要；講到政改，佢亦唔覺市民真正普選特首嘅權利有乜嘢咁重要，冇為港人着力爭取，明顯戀棧自己權位。
就連睇電視嘅權利，佢都要控制喺自己手中，任憑市民幾咁極力爭取，都唔畀港視攞到免費電視牌，只容許市民睇大台嘅低質素節目。而參選時塑造清廉形象、反官商勾結嘅佢，卻被大爆秘密收受澳洲工程公司UGL集團400萬英鎊，但佢事發至今，都未向市民公開解釋過偷袋呢筆巨款嘅前因後果，只接受友好傳媒訪問辯稱冇涉及利益衝突，誓死力保「袋袋平安」，小心貪字得個貧呀。
袋住先三儍無視民情
【最難啃電影】
三人行，必有我師；但有三個人若然一齊行，則只會一味叫人袋住先。政務司司長林鄭月娥領軍，包括律政司司長袁國強同政制及內地事務局局長譚志源在內嘅政改三人組，年初賣力演出到年中：新年時節去派普選利是封、出席N個活動死撐普選唔會無影無蹤；林鄭甚至押上高民望，大讚先行一步總比原地踏步好，但三人組向北京提交嘅政改諮詢，冇建議接納唔少港人支持嘅公民提名喎。
及至人大8.31一錘定音，落三閘封殺泛民候選人，三人組緊跟中央路線，冇破格為異見者爭取入閘下苦功。及至佔領運動發生，三人奉命同學生對話溝通，卻只交行貨話向北京提交民情報告。人大框架下嘅假普選，泛民實在啃唔落，嚟緊一定喺立法會否決方案。呢個政改好抵死，真係冇改錯名喎！
狼太母女公關騷災難
【最「毒」女配角】
歷任特首夫人，好少登到政治舞台，但狼太唐青儀今年初試啼聲就一鳴驚人，憑住囡囡齊昕玩大踢爆，等大家對佢有多一啲了解。
記得今年中，齊昕嘅自殘𠝹手照嗎？狼英一家三口其後喺海德公園合照，藉此闢謠，齊昕仲同媽媽着鴛鴦鞋，大騷兩母女溫情無限。點知原來呢次，只係狼英嘅公關伎倆，齊昕仲喺其後接受傳媒訪問，大數母親嘅不是。
可憐天下父母心，被阿囡咁篤法，自然不滿，眼見中大學者蔡子強為此撰文厚多士，狼太某日出巡施展渾身解數，大鬧蔡子強刻毒、涼薄，一個「所謂」學者嘅air quotes手勢，俾大家知道呢位夫人幾咁架勢，估唔到年尾仲憑一襲人形龍蝦裝，攞埋視覺效果大獎，唔知明年，狼太會唔會有更多佳作？
聲稱移民 薑蓉拒找數
【最紅男配角】
等，寂寞到夜深，一班高登仔，始終未等到，薑蓉去移民。嗱，如果以為八方係想趕薑蓉走，真係大錯特錯嘞，事關呢，今年打住「反普選反佔中大聯盟」招牌，喺反佔中運動上大搖大擺嘅薑蓉，其實喺好早之前已經話過，若然佔中成功，佢一定會移民，難怪大家期盼佢有移民之日！
查實周融原本係有居英權㗎，鍾意隨時返英都得，怪不得咁大口氣！但佢為咗打好反佔中呢場仗，連居英權都放棄埋咯，之後收集咗有唔少水份、聲稱有成183萬嘅反佔中簽名，之後仲氣勢如虹，整咗個創造唔少就業機會嘅反佔中遊行，甚至照抄文革整咗條舉報罷課嘅白色恐怖熱線，刺激全城腎上腺素。今年種種貢獻，肯定令佢喺來年授勳名單分一杯羹，既然等住中獎，試問點會移民住？
李八方
mailto: [email protected]