年尾，又到埋單計數嘅時候。想睇「大事回顧」？啲咁正經嘅嘢，大家應該冇機會喺《收市閒情》見到；我都係想寫下「柒事回顧」多啲！正所謂江湖柒，江湖了。嚴選2014年「財金界七大柒事」！
第7位
林芊妤Coffee，同達利國際（608）太子爺林知譽，喺殘廁搞咗一次「有聲~有色」嘅Gathering之後！Coffee由冇人識，變曝光率急升，仲成功轉型為當紅瑜伽導師！
相反，林知譽就慘。街外人喺街見到佢，未必知佢叫咩名，但會叫講得出「殘廁」兩個字！就正如見到劉江華，你會諗起垃圾桶一樣。花名嘅嘢，分分鐘跟一世。
第6位
「超人」一向係等如「香港首富」。點知彭博年頭突然話呂志和身家已超越超人！當時全香港傳媒仲大報導砰身家。
彭博話晒係世界權威財經通訊社，點會諗到一日後，呢個權威就忽然話自己搞錯咗，計錯呂志和銀娛（027）持股量，犯埋啲低級錯誤。就咁樣，呂志和只係做咗首富1日咁大把。
第5位
「神抄之塔」兩兄弟，「抄」考日本《Puzzle & Dragons》而上位。之後仲引起雲遊（484）注意，3月宣佈以7000萬美元，約5億港紙入股兩成股權！一隻Game，令間公司值26億！
兩兄弟憑山寨Game做富豪，當然令同好網民不齒（包括葡萄成份）！點知兩個月後，因台灣法例問題，令雲遊縮沙，交易取消。神抄兩兄弟嗰5億，轉兩轉，咁就見財化水。香港人最鍾意睇人仆街，當日網上唔少人都請咗小鳳姐登場。
第4位
大名鼎鼎雷鼎鳴，話佔中令香港財富損失7000億，即係佔中參與者，人均造成500萬元破壞，平均每名港人承受5萬元損失！咁多，唔係呀嘛？當然冇，雷教授推算邏輯錯晒，已俾人笑到飛起，咁都不特止，事實係連個天都唔幫佢，因為恒指於佔領期間，3度升破24,000點！至於樓價亦有升冇跌。
更好笑嘅係，之前佢以為有記者走去挑釁藍絲，問參與者收咗多少錢，點知事後發現，原來佢誤將網上改圖當係真…雷教授呀雷教授，切勿放棄治療，打錯，切勿放棄上網了解年青人至啱。
第3位
呢宗柒事由悲劇開始…話說一個男子，因為點都Cut唔到有線（1097），心情極度沮喪，憤而持刀衝入有線電視大樓，親自真人「Cut線」，仲大叫「我要搵吳天海！」令地下一名保安員受傷。
相信有線點都估唔到，《CUT唔到有線潮文》最終竟然會有真實版，當時有線更表示：「深表震驚」。事件終於迫到有線跪底，於網頁上加多「終止服務功能」，或者咁可以幫到希特拉Cut到有線。
第2位
長實（001）新盤嵐山，破天荒推出多個奇則，一係就超迷你單位，得177呎，搞到姑姑、過兒唔可以一齊瞓；一係就一入大門，有三個廁所迎接你，真係佛地魔都俾你嚇死；再唔係，就係窗口對住人哋個祖宗山墳，清明拜山夠晒近。講真，嵐山就算唔係向海，水源都供應充足，「奇則」有咁多賣點，等人（包括千頌C我）長抽長有。
第1位
我恐懼
完
by千頌C@堆填區
http://fb.com/winbigwok