【壹週刊】759呢半年新開雲吞麵、茶餐廳、車仔麵之後，最新又有759 Cafe，開在大埔超級城近三千呎的Skyland生活百貨內。Skyland主打BB用品、衣服、化妝品、家品等，Café在店鋪最入面，貨架旁邊就係餅櫃水吧位，座位只得廿個。
食物有沙律、法包三文治、薄餅、窩夫、蛋糕、馬卡龍共十七款，放在餅櫃內，唔使睇menu。唔好以為有齊latte、cappuccino之類先叫得做cafe，呢度淨係得咖啡、奶茶和果汁，雖然係用cafe咖啡機沖，但飲落就似茶餐廳咖啡。
食 物質素合理，沙律菜無變黃，生果無出水，新鮮之餘仲幾甜，二三十元有呢種貨色，完全冇投訴。我仲覺得$20兩粒馬卡龍、$28有件心太軟，咁平俾街坊試吓 時下流行法式甜點，好有心思添。之但係呢，對於pizza和芝士蛋糕的貨源，可以講究啲嗎？$22一塊細薄餅，根本就係超市雪藏貨，芒果芝士蛋糕質地味道 都怪。價錢平，只可以供應簡便即食食物，唔緊要，但都喺759揀啲靚啲的貨出來吖。我見隔離位個小妹妹食窩夫食得好開心，即叫即製，聞到都覺好味。不如改 吓個餐牌，沙律、三文治、窩夫之外，加埋即製班戟、焗薯、多士之類，一來好過pizza多多聲，而且我信大廚handle到喎！仲有，啲膠碟、膠叉、紙杯 全部即棄餐具好礙眼！今時今日cafe咁唔環保，過份啲喎！
759 Cafe
地址︰大埔安邦路8及10號大埔超級城B區2樓287-295號舖
電話︰3669 6948
iPhone版下載： http://goo.gl/1SDaWF
Android版下載： http://goo.gl/xfQS8D
壹週Plus網頁： http://nextplus.nextmedia.com/