一直被指插足「永安太子」郭永淳同前妻伍智恆嘅婚姻，背負第三者之名嘅餅碎楊愛瑾(Miki)，同男友郭永淳感情一向穩定，郭永淳好少開口講呢段情，兩人亦只係近年先公開情侶關係。
近期兩個人都冇咩特別新聞，但上周日郭永淳就忽然向傳媒發出聲明，力挺Miki唔係第三者，又話係自己決定離婚之後先認識Miki，首次開腔為女友護航。
突然發出一份咁嘅聲明，梗係有啲事嘅，昨日就有周刊報道話郭永淳係有感Miki多年來為佢背負太多嘢，一直唔出聲，只係唔想刺激前妻，但就一直內疚，好似累咗Miki咁。而報道亦話Miki最近開始進修金融課程，有意淡出娛樂圈，下年嫁入郭家做豪門新抱。