人生總有機會擔任後備：細時踢波，實做過後備；踏入職場，公司有大Project，點知老闆只揀心腹入組，又做「後備」；放工後，點解約咗Mary三個月先show你？因她被做iBank嘅Simon同揸寶馬嘅Peter約咗，情場都要做後備！不過，點都應該無職業球隊做後備門將咁慘。
上季英超380場比賽，只有9場換了後備門將，落場機會只是2.3%。有人可能諗做後備唔使落場，淨袋數千甚至過萬鎊周薪，該是絕世筍工吧？但賓福特門將李察李爾（圖）話你知並唔係咁，他現年32歲，14年職業生涯，近3季只踢過7場正選。他形容後備門將感覺是：「惆悵、自我懷疑、甚至有罪疚感！球隊贏波升班，你『陪』隊友慶祝，毫無感覺；不及落場踢盃仔，就算只是贏業餘隊，反會開心到瞓唔着！無人會喜歡做後備的生涯。」
若不幸做咗後備，點算？要學吓李爾喇！首先是裝備好自己，萬一老闆啲心腹頭暈身㷫，就係表演時間。等極都冇運到點算？咁就要調節心態，保持積極，諗吓總有人慘過你，好似李爾咁，你無可能約咗Mary成14年先出得幾次街啩？（如是，你該早於第2年改約Amy、Betty……）。
方柏翹
now足球評述員