正所謂三十而立，「大帝」勒邦占士周二就度過佢嘅30歲生日，就算佢已經4度當選MVP，兼獲兩次總冠軍，今季重返騎士仍然鴻圖大計，希望幫家鄉拎到NBA總冠軍，可惜呢排撞正球隊立立亂，真係生日不快樂。
12月30日就係勒邦占士生日，不過騎士當晚就要作客鷹隊，大帝就要喺作客旅途度過生日；以勒邦占士身家以億億聲美金計，NBA各主要榮譽都幾乎拎晒咁滯，基本都冇咩所求，不過大帝仍然唔滿足，佢接受美國《Bleacher Report》訪問就話：「30歲對自己嚟講，係人生另一個階段，你睇睇我成長嘅地方，有啲人甚至活不過21歲。經歷就係人生最佳老師，我知道我年青時有好多機會，我冇好好把握，好彩仲遇到其他機會，不過唔係咁多人都幸運，所以再有機會出現，就要好好把握。」大帝冇明確講有乜生日願望，但仍然希望成為史上最佳籃球員之餘，仲希望成為好父親、好人。
不過勒邦占士所屬嘅騎士呢排就唔多精神，聖誕節起計3戰只得1勝2負，美國傳媒就爆料，球員已經唔多聽教練布拉特支笛，暫停時布拉特講戰術，球員就漫不經心，布拉特更衣室訓話，球員又唔多理佢，咁搞法又點樣爭冠軍呀。
識睇，一定係睇足英台【英波Live】：
http://soccer.appledaily.com
http://bit.ly/engballlive