【本報訊】世代矛盾非一日之寒，學民思潮與泛民一早就公民提名的取態舌戰連場。但學民發言人黎汶洛不喜歡以「世代之爭」形容彼此分歧，「大家都冇政治實權，共同敵人一定係當權者，分歧只係行動策略上嘅磨合」。矛盾在雨傘運動加深，源於老一輩擔心留守和升級令泛民流失支持者，影響議會工作，但學生卻認為「唔應該再喺制度入面玩」。
指未來更須落區
黎汶洛笑言，學民「從佔領Day 1永遠係最曳」，初期泛民建議縮小佔領區，「學民希望想攞到嘢，但係有啲人話外界唔係咁睇，應該要符合公眾期望」。但學民堅持敲定運動方向之前，必須先游說村民認同，雙學遂以「縮乜細佔領區呀」的態度回應泛民，「氣氛唔算好僵，大家態度不嬲都係咁，寸吓嘴，或者全部靜晒唔出聲」。
學民在升級失敗後絕食，再次令矛盾浮面，泛民及學聯均有成員建議退場，學民為避免重蹈反國教倉促退場的覆轍，斷然拒絕，「群眾唔能夠接受你玩過山車。我問，你有乜行動方向？不斷講要走，咁你會唔會出嚟（對群眾）講先？」他透露，學生絕食促使行政會議及建制派議員向政府內部提出重啟對話，惜鷹派企硬，最後失敗，「但起碼我哋做過，而唔係等待」。學民過去一年落區深耕，打下公民提名的江山。黎指佔領陣營現處下風，未來更須落區，「有啲政黨落區俾人鬧，就攞咪鬧番人，令中間派街坊覺得吵鬧，討厭政治。但係你收番個站，去遠少少擺，唔係嗰一刻嘅輸，而係換來將來嘅贏」。