中文大學出版詩人北島選編嘅「給孩子的詩」，好值得買一本回家與孩子細讀，不止對培養孩子之閱讀興趣有益，家長讀埋一份，可重拾一啲青春氣息與浪漫情懷。
閱讀對孩子有多重要？唔駛講嘞嘛，唔通無時不打機，玩社交網站更有益咩。牛津大學出版社（中國）社長麥嘉隆最近出版一本新書，叫做「麥言回首─秒殺偽管理」，可能因為避嫌，唔由牛津出版（佢話除教科書外，牛津只出版名家著作如董橋，北島，司徒華及其他知名學者、作家等嘅書），而係由天地圖書出版，仲會在明年一月三日星期六下午二時半喺灣仔天地圖書門市部舉行新書發佈會，請埋曾任曾蔭權特首辦新聞統籌專員七年，現任公關顧問嘅何安達到場參加討論，與麥嘉隆對談及分享近十年嚟嘅工作經驗。何安達以前係著名記者、編輯、公關高手，在新亞校友圈子中，以讀書多而著名，算係博覽英文書一類，麥嘉隆又係不停閱讀管理書嘅，何麥兩位對話，相信會有火花。
麥嘉隆本「麥言回首」第110至112頁，談「成功教育的撒手鐧」，以新加坡及芬蘭為例，最後講到世界首富蓋茨（現在或者係第二至第四名）之言。牛津出版社對全世界各國嘅教書制度，教科書市場都有認識，麥嘉隆身為中國社長，當然亦識得唔少，佢話芬蘭教育一項特質係自小培養學生閱讀習慣和興趣，一位芬蘭人平均每年自公共圖書館借閱18本書，所有教育學者都認同，閱讀是提升兒童自學能力，專注力和自學能力的關鍵，至於蓋茨，不時帶住一個重二三十磅重嘅大布袋，裏面放滿書本以及佢嘅讀書筆記，又設立一個網站gatesnotes.com，公開佢嘅讀書心得。有人問過老蓋茨（西雅圖名律師）點樣教仔，老蓋茨話自己經常出外公幹，小蓋茨留在家中就由媽媽教讀書，或自己與書本為伍，細細個就讀「世界大百科全書」，現在小蓋茨名震全球咯，還是孜孜不倦地讀書，認為專注推廣閱讀係好教育嘅基礎。嗱，微軟創辦人蓋茨冇教孩子上網打機呀，佢最鼓勵兒童閱讀書本！麥嘉隆呢本「麥言回首」不止講教育，內容遍及不少流行管理論之可行性及可笑性，分辨真偽管理，夠膽篤破甚麼「藍海戰略」（Blue Ocean Strategy）係亂講一通，呢番說話會得罪好多人，麥嘉隆若非有料到，焉敢牙擦呀！