上交所喺12月24號公佈今年年尾嘅港股通交易日安排，12月29號至31號（本周一至周三）暫停港股通服務，真係玩殘咗唔少內地南下嘅投資者。
上交所之前喺11月嘅時候，已經話定12月25號冇港股通，然後一路撞正聖誕假、新年假、周末，要到1月5號（下周一）先有番。即係話，呢個停賽期，足足長達11日！投資者想年尾沽貨收爐都冇計。如果期間環球市場有惴乜冬瓜豆腐，亦都做唔到任何嘢。
滬港通交易，要滿足滬港兩地股市都開市，以及交收日唔係公眾假期呢兩個條件。A股交收行T+0，唔會受影響，但港股行T+2，要預埋交收日，港股通交易日已經少過滬港通。最慘係，上交所隨意改賽制、搬龍門，搞到投資者好難計數。
以12月29號為例，T+2係31號，銀行仲開門，冇理由唔俾人玩港股通。有消息話，因為31號港股得半日市，要提早收爐，但12月24號都係半日市，之前22號嘅港股通就冇影響，總之完全冇規律。
上交所仲要咁遲公佈，如果投資者諗住聖誕假前入貨，29號食糊，就可能中招。上交所咁搞法，直頭等於幫香港趕客！
李可強