山系女孩　野炊跨年

今夜是告別，明早是希冀。為了迎接二〇一五年的首個清晨，有想過露營觀日嗎？近年，各地湧現了一批新人類︱︱山系女孩，她們有顆出走的心，愛行山愛露營，架一個別致的營舍，掛幾串繽紛的絲帶，再配上一身花花綠綠的山系服飾，婆娑樹影處，就是她們的派對池。要點派對食物？人在野其實也有好滋味，山系女孩為你示範簡易野炊料理，並以鳥語蟲鳴、清新空氣來調味。祝大家新一年，一切安好。
記者：陳詠敏
攝影：伍慶泉、周旭文、楊錦文

露營，很多人以為是男人的浪漫，背上沉甸甸的裝備、翻過一座又一座崇山峻嶺，在險要奇巖上架起帳幕，以天為被、以地為床，坐看雲起時。
但女生會告訴你，露營跟行山可以是兩回事，既能二合為一，也能純粹露營。「香港其實有好多方便嘅露營地點，落車之後行一小段路就可到達，好似大帽山郊野公園，喺車站行過去，唔使五分鐘就到營地！」看來嬌滴滴但有三年露營經驗的Becky說道。「每個人嘅能力都唔同，我認為一個鐘頭之內可以到達嘅，都係理想露營地點，畢竟露營比行山要帶更多嘅嘢，例如帳幕、食水同爐具等，始終對女生嚟講會有啲吃力，唔適宜行太耐。」Becky對露營地點並不揀擇，但最重要的一關就是紮營地點與廁所的距離。「唔好太近，又唔好太遠，乾淨最緊要。我覺得做山系女生，最重要係放下身段。我有啲女仔朋友唔鍾意露營，怕污糟、怕瞓睡袋、怕廁所遠。但係接觸大自然就係要將就吓。例如化妝，平時幾咁貪靚都好，露營嗰陣我都一定係素顏，不過防曬工夫一定要做到足！」Becky補充。

人在野，最大的娛樂節目就是做飯

又有很多人以為，野炊吃的不就是罐頭和公仔麵？曾經幫戶外雜誌撰寫超過一百個野炊食譜的Rebec告訴你，其實不一定，儘管置身山野之間，仍可烹調中、西、日、韓、泰等各地美食，跟在家中無異，只不過，你要花更多心思去準備。
「一般兩日一夜嘅話，你鍾意食乜都得。如果係露營兩三天，就要有啲計劃。第一日要食新鮮食材或者海鮮之類。第二日可以食肉，不過肉類事先要喺冰格雪到好似石頭咁硬。第三日就冇辦法啦，只能夠食麵同蔬菜一類比較簡單嘅。而且食材要預早喺屋企洗好切好，調味料唔好帶一大樽上山，要用樽仔裝好。」Rebec說。「所以平時我去快餐店都會收集啲糖包、鹽包同胡椒粉，露營嗰陣正好大派用場！」Becky補充。這個方法看似搞笑，但老實說真的十分實用！
至於煮食用具，有平底鑊及煲就足夠了，爐頭則最好選用gas的。「酒精爐唔熟悉嘅話有搶火危險，石蠟爐又要一次過用晒，仲係gas最易掌握又安全一啲，一罐已經夠煮兩個鐘。可以嘅話最好預備一個風擋，等火力更加集中，煮食時間更加短。」Rebec又教路，最好預備兩個爐頭，一個烹調需時較長的菜式，例如燜肉之類，同時可以當作營火取暖；另一個則用來製作其他菜式。當中，最重要最重要的一點就是，必須在太陽落山前煮食，「唔係一入夜就會睇唔見啲食物煮得熟未，有冇煮燶，有冇曱甴昆蟲爬咗入去！」只要預備充足，任何菜式都可以做得到，兩位女生就曾試過煮西班牙海鮮飯、意粉、韓燒、燉雞、煎牛扒……
「要一早做好準備工夫，其實係幾麻煩嘅。」Rebec又說。「不過平日係屋企煮飯，廚房細細，朋友想幫手都冇地方俾佢企，大家冇交流，又會覺得自己好似工人咁。野外就唔同喇，你煮飯嗰陣，朋友可以嚟幫手，又會偷食，又會請教食譜，成個郊外就好似一個open kitchen，煮飯就係玩樂，呢啲就係野炊嘅樂趣。」Becky在旁打岔：「所以喺露營嗰陣食飯，係個漫長嘅節目，一邊煮一邊食，又再煮又再食，一食就係兩三個鐘。」
漫長？人在大自然，有的正是時間和閒心。