蘇保羅在近八季元旦日七次有馬贏，共取12W，是各馬房之冠，而近三年同日共派出六匹上仗跑前四名之馬匹列陣，更交出五勝一位之驕人成績，證明他在元旦日安排有近績支持之馬匹上陣必定有計。睇番蘇廐今戰列陣馬中，「天笑」、「御鋒」及「點解」正是於上仗跑入前四名，相信是馬房出擊重心。
第四場「點解」一出即勝後無以為繼，再跑五仗均未能再捷，卻悉數跑入三四名，不過幕後仍然唔滿意，結果拉倉轉投蘇廐，練者安排呢匹轉倉馬在新一年第一天上陣，似乎立心要省招牌；而第八場「御鋒」剛於前次賽事跑第四，八歲馬咁快又跑，當然係想趁馬勇爭取成績；至於尾場「天笑」堪稱蘇廐招牌馬，上季六戰悉數入位，今季三戰更獲兩冠一季，至今未失三甲，而且表現更勝上季，等番上仗贏馬之田草1600米先上陣，應有決心爭取今季第三W。