Sony一部講述刺殺北韓領袖金正恩嘅電影《The Interview》，由電影院走入國際政治舞台，一個轉身射個三分波，成功走返入去一眾影迷電腦嘅hard disc，呢一場仗Sony贏得漂亮。話說成套戲都係搵金正恩去恥笑，仲要終極目標係殺咗佢，於是方丈金正恩小氣地搵人hack入Sony，仲威脅電影上映會有恐怖後果，搞到Sony初時跪低唔上畫。點知奧巴馬突然跳出來，命令Sony照播。呢個moment，Sony就注定成功。
首先呢套戲影評原本麻麻地，但能夠搞到金正恩都出聲，即時令廣大影迷好奇度大增，想知套戲邊忽踩到佢條尾。好啦，然後奧巴馬責令Sony唔可以自我審查，呢個時候套戲好唔好睇已經唔重要，因為奧巴馬嘅聲明，已令睇戲嘅人，搖身一變成為「民主自由」代言人。你入場睇戲，即係撐美國。兩大原因推動下，套戲想唔收得都幾難！
一般嚟講，美國大院線為保障自己，會要求電影等一段時間後先至發行數碼版。今次由於大院線唔敢播，只得細院線播，Sony大條道理，向網上平台埋手。Google、微軟、蘋果都線上發行呢套戲，結果大收旺場，成為Sony最暢銷網上電影。電影線上發行，甚至比線下提前24小時，完全打破電影發行慣例，令Sony以後可拎住今次數據，增加向院線講數嘅牙力！所以話，Sony今次真係大獲全勝。
Fifi
http://www.facebook.com/lovefrystock
本欄逢周二、四刊出