記得阿里巴巴創辦人馬雲講過，大數據係未來核心，又話未來幾年要將一切業務數據化，一切數據業務化咁話，究竟點樣做大呢瓣業務？馬雲未必知，但佢有能力請來識做嘅人去幫佢，呢個係古往今來成功人士嘅絕技，馬雲最新請來兩年前出版《大數據》嘅作者塗子沛做阿里副總裁，佢將會係阿里一個神秘研究部門三位負責人之一。
呢本《大數據》除咗係長期暢銷書，仲曾經俾國務院副總理汪洋推薦，話睇完之後「非常有啟發，大數據對政府部門有重要意義」咁話。
塗子沛係江西吉安人，曾經喺政府部門工作過10年，其間參加過幾個全國大型系統開發，開發咗全國第一個反偷渡遣返信息管理系統，2006年出國讀書，畢業後喺外地幾家軟件公司工作，今次願意由矽谷返杭州，相信馬雲落咗唔少嘴頭。