2014年到尾聲，今年大市亦只係剩返兩個交易日，呢篇亦會係今年筆者喺呢個專欄嘅最後一篇，先預祝各位讀者新一年各方面表現都跑贏今年。
入正題，滬港通由上個月17號開通到而家已經超過一個月，係時候同大家總結一下表現，先從指數入手，港股由滬港通開通截至到噚日，仍然輸緊300幾點，希望最後兩日可以追得返。至於滬股方面，滬綜指上月底開始發力爆升，到噚日都仲升緊，單單呢個幾月已經升咗近三成。
呢個幾月，投資者鍾意透過滬港通買乜呢？先講北向滬股方面，行業以銀行、保險同埋證券股係首選，其次係一啲香港買唔到嘅嘢，例如貴州茅台，同埋大秦鐵路，個別活躍股份以平保為首選，大部份時間都喺活躍榜排首五位，其次係中信証券等等。
至於強國股民嚟買乜呢？相對於滬股通，港股通入貨嘅股民投資選擇比較多元化，從行業而言，以石油、石化為主，其次為證券及保險股，內房股亦是其中一個主力入貨區。個別股份方面，海通證券（6837）、中信証券（6030）、海油服務（2883）、中石油（857）相對較多人鍾意。
流氓