港島車位炒到貴過新界樓，唱作歌手藍奕邦原來都係當中得益者。佢同阿爸藍兆文等三人喺2006年，用90萬元買入一個跑馬地禮頓山車位，市傳最近以400萬元賣走，賬面淨賺310萬元，三個人瓜分利潤，藍奕邦可以賺「一球」呀！
藍奕邦星途唔算一帆風順，佢又曾喺傳媒面前話自己唔識做生意，同人夾份喺中環搞音樂餐廳曾蝕錢，不過佢阿爸藍兆文就勁嘞，係東南亞最大性玩具商，做過好多叫Mary嘅日本吹氣公仔。
有父親庇蔭，加埋阿爸大多數物業都同佢聯名，呢次更加大豐收。翻查資料，兩父子喺2002年係禮頓山用1,700萬多啲買咗個高層單位，2010年以4,350萬元沽出，淨係個單位已經賺咗2,600萬元，呢次賣埋個車位再執過百萬。