人民力量主席袁彌明（Erica），日前終於同愛郎林雨陽拉埋天窗。Erica喺婚宴當晚，換咗多套性感晚裝大騷身材，畢竟係選過港姐，呢啲騷哥利嘢對佢一啲難度都冇，擺pose好自如。之但係美麗卻係有價㗎，佢大呻件婚紗好重，搞到背脊成塊板咁硬，必須要做Spa鬆吓，仲透露結婚當日唔係好舒服，只係個樣呃倒人啫。
而佢覺得個婚禮好完美，老公仲自彈自唱冧歌𠱁佢開心，真係幾辛苦都抵番啦。佢哋兩公婆仲好鬼馬，拍片分享生活點滴晒恩愛，林雨陽喺片中不顧形象、傾力演出，露股之餘仲放埋屁，認真有「聲」有「色」，尾段佢仲自爆：「我由第一眼開始已經好愛你，好想同你結婚。」試問邊位女人聽到，會覺得唔冧？