聖誕新年好多打工仔放大假輕鬆吓，NBA球員就冇咁好命，唔單止冇得唞仲要開OT㖭；好似上季總冠軍馬刺咁，12月真係極為忙碌，一個月要應付18場波，由聖誕節起計仲要4日打3場，好彩周日殘陣出擊，都以110:106擊敗火箭，拎到聖誕後嘅首勝。
捱過16場勝率遜5成
馬刺教練普波域治之前已經抱怨，12月賽程極為艱困，31日要打18場波，即係平均1.72日就要打1場（見附表）；嗰天仲好似想增加對馬刺嘅考驗，今個月已經兩度鬥至3加時分勝負，呢個月加時節數加埋有8節㖭，而且球隊仲有傷兵問題。好似周日主場對火箭，一對新舊總決賽MVP尼納特同柏加均因傷缺陣，好彩38歲前鋒鄧肯仲老馬有火，頂住火箭「魔獸」懷特侯活之餘，射手丹尼爾格連準繩外圍貢獻24分，幫馬刺以4分反勝火箭，終止兩連敗。鄧肯賽後就特別盛讚克服肩傷、今季首度上陣嘅後備控衞柏迪米爾斯，鄧肯賽後話：「米爾斯充滿力量，佢嘅進取亦都感染隊友，為球隊帶來巨大嘅火花。」
截至周日，馬刺12月已完成嘅16場比賽，只係取得7勝9負，勝率只得約43.8%，比整體勝率跌成15%。雖然臨近月尾，馬刺職球員見到曙光，不過餘下兩場作客灰熊同主場對塘鵝，都係內線硬淨嘅對手，鄧肯仲有排捱。
同日另一支德州勁旅小馬都贏得險，主場面對雷霆，靠第4節打出31:19攻勢，以112:107反勝，小馬有奴域斯基攻入30分，不過「子彈人」艾利斯第4節扭傷左足踝退下火線，傷勢睇嚟唔輕。
識睇，一定係睇足英台【英波Live】：
http://soccer.appledaily.com
http://bit.ly/engballlive