過去一年，內地股市流行「炒地圖」，炒中央幾時再新開自貿區，範圍有幾大，天津、廣東、福建自貿區概念股輪流炒。
蛇口爆冷入自貿區
噚日阿爺開估，幾個新自貿區範圍塵埃落定，有大熱倒灶，亦有黑馬爆冷，買中嘅股民當然贏大錢，但買錯嘅就會輸鑊甘。捉路係高難度動作，香港股民要學嘢，真係要預咗交學費。
噚日爆出嘅最大冷門係，深圳蛇口竟然被納入廣東自貿區，市場事先真係一點風聲亦冇傳過，大家一路都係講緊前海。
有消息指，蛇口可以入閘，係背後大地主招商局一路發功，背後做唔少嘢，難怪招商地產噚日升停。
另外，中央公佈嘅廣東自貿區，竟然冇咗白雲機場附近保稅區，亦出乎意料。事關之前內地傳媒已多次報導，白雲機場實有份，結果出閘脫腳，白雲機場股價噚日插5%。
福建泉州之前一路被傳會被納入福建自貿區，結果最終亦冇份，噚日福建股普遍逆市下跌。泉州嘅福建股近排負面新聞多多，本來以為靠自貿區可以起死回生，而家恐怕更加難有運行。
李可強