英超前列爭得緊湊，下游一樣鬥到你死我活；包尾嘅李斯特城喺周日作客贏咗侯城，令一堆護級分子積分差距又收窄咗，繼禾諾克之後，睇怕好快又有領隊被炒。至於紐卡素主帥柏度帶領球隊喺周日尾場反勝愛華頓，一樣被視為離隊熱門之一，無他嘅，盛傳佢會跳船過檔水晶宮執教，開開心心走人。
西布朗艾雲被炒大熱
由排第12嘅愛華頓到尾2嘅般尼，喺周日英超全部都贏唔到波，情況最壞嘅一定係西布朗，隊波又輸一場，作客史篤城輸0:2，3連敗之餘近9場聯賽只係得1勝1和7負劣績，難怪主帥阿倫艾雲已被視為下一個英超離隊領隊嘅大熱，得1.33倍（見附表）。
紐卡素喺同日英超尾場主場迎戰愛華頓，先失守下由柏比斯施斯、艾約斯佩雷斯同哥爾碧克各建一功，以3:2反勝對手，結束聯賽3連敗。賽後柏度冇接受訪問，外界進一步揣測佢真係打算返水晶宮做領隊。柏度喺球員時代曾經效力過水晶宮，水晶宮喺上周六炒咗禾諾克之後，仲未搵到新領隊人選，睇嚟柏度接任更加似層層，不過要挖角到16年中先約滿嘅柏度，水晶宮要拎500萬鎊（約6,000萬港元）賠畀紐卡素，呢樣成為最大障礙。想當日紐記喺今季季初戰績唔掂，班球迷就扯晒橫額要佢走，柏度之後好爭氣咁攞咗11月最佳領隊，我求大俠估佢對呢間球會留戀極都有限，柏度接任水晶宮領隊賠率，亦由周日嘅1.57倍到周一升溫到1.29倍。
馬天尼斯賴球證累事
紐卡素贏咗愛華頓，搞到後者主帥馬天尼斯𠵱家都已經被拖埋落水，離隊賠率得返17倍，佢同侯城嘅布魯士都係排喺「被落鑊」名單嘅前列位置。馬天尼斯喺上季接手愛華頓教得好哋哋，但今季就反反覆覆唔多掂；佢喺賽後就炮轟紐記前鋒柏比斯施斯，喺佢哋領先1球嘅時候向守將史密斯高文連環開踭，應該一早領紅被逐，球證如果睇得到又何來施斯扳平嗰一球。
另外，侯城喺周日主場輸畀包尾嘅李斯特城，布魯士嘅水深火熱程度唔低得過馬天尼斯，隊波自從由11月起10場英超已經輸咗7場。侯城喺15年元旦咁啱就喺主場迎戰愛華頓，呢場搶分大戰嘅輸家，隨時輸埋份工都唔奇。
識睇，一定係睇足英台【英波Live】：
http://soccer.appledaily.com
http://bit.ly/engballlive