無綫J2前晚播《新城勁爆頒獎禮》，黃秋生睇完之後喺facebook勁插：「新城個音樂頒獎禮真係嚇Q死人，有啲所謂歌手，連聽力都冇，係咪要搵個老師學吓唱歌呢？十個只有一個合格，搵到咁多走音鬼叫真難得。（班友係咪去搗亂㗎？大多數走音）我覺得夏金城應該重出江湖。聽吓王梓軒同糖妹學吓乜嘢叫唱歌啦。嘩！有個仲着到成個男妓咁，但係好唱得……你班友真係要多謝阿銳哥（朱明銳），咁X樣都畀你三十秒。」
王宗堯寸無綫小器
而有份演港視劇《選戰》嘅王宗堯同雨僑合唱首《埋頭苦愛》嘅得獎片段，俾無綫剪走，王宗堯前晚亦忍唔住喺fb鬧：「方丈，真係好小氣㗎。」
噚日秋生接受電話訪問繼續鬧：「睇到火滾，聽到班友仔走晒音，好明顯唔關咪事，點解有人唱得咁好，好似有個大陸歌手黐眼睫毛，着到男妓但唱得到，邊個點佢着成咁？安仔對鞋係咪攞咗Sammi，十年前嘅裙𠵱家攞嚟着，我有幾條畀埋佢，哈哈，講吓笑啫。」再問番秋生所講嘅男妓係咪白龍？佢話就係喇！
撰文：馮仁昭