3日踢兩場，就係鬥體能鬥部署，就算天時地利人和，都唔似預期，只要競爭對手同樣有閃失，優勢依舊；半季剛完，車仔啱啱南征失分，不過摩佬回程返倫敦，偷笑了！
踢快車，點樣好好保護球員？相信大名鼎鼎嘅雲高爾，同上屆幫藍月亮攞過冠軍嘅比歷連尼，都未有摩佬嘅功力。
計兵源，去到呢個全季最難捱嘅比賽階段，車路士，依然驚人地有17至18位精兵備用；周日晚逼和修咸頓一役，有兩位鋼門、3位前鋒任用，仲有3位巴西國腳級中場，喺輪換下，不列正選或不用南征。最後早開波一粒鐘嘅車仔，可能知曼城喺主場踢了半粒鐘，已領先般尼2:0；趁修咸頓踢少一人，末段想反客為主博反勝，雖然最終失兩分，但餘勢仍在，反映在快車期，未有影響呢架現時1.3倍、奪標頂頭大熱嘅「無敵戰車」。
藍戰士優勢尚在
好一個摩連奴（圖），賽後又賴球證冇畀顯眼過倫敦大笨鐘嘅12碼，仲要罰法比仔插水；呢招轉移視線用得太多，表面好勞氣，將有限嘅訪問時間盡放到已明日黃花嘅爭議事件，傳媒甘之如飴照做頭條，失分也不損士氣。最後車仔喺回程返倫敦途中，知道曼城下半場被降班膽般尼逼和2:2，爆出今季其中一場英超大冷；仍領先藍月亮3分嘅車仔，笑晒。
曼城在今次快車期，可能同已3連敗嘅愛華頓一樣咁傷，要衞冕，鬥般尼呢3分一定要袋。筆者早前喺拙攔提過，不認同藍月亮，如英國傳媒月初預測，有機會喺年尾趕過車仔；傷晒前中後3條A（高柏尼、耶耶托尼、阿古路），呢隊波從來不值熱捧，賽前，小弟也提點熱門客，般尼甚少大敗。占士米拿，8天內連續3場喺冇鋒陣，客串打正選箭頭，技窮了！比歷連尼賽後認衰，「no legs to score」，除咗老實講己隊無力再攻外，也反映球隊鬧前鋒荒；下月賽程轉難踢，將會遇上阿仙奴及車路士，又有耶耶托尼離隊踢非洲國家盃，比帥，笑唔出咯！
疲魔難讓史篤城
雲高爾嘅紅魔，一隊球員接近30人，卻成籮傷兵，主帥嘅訓練方式同部署，必定要負一定責任；雲帥初來英超，近日只一味埋怨英超不應有快車期，作客鬥唔易惹嘅熱刺，竟然排出球隊近年罕有，同兩天前贏紐記一樣嘅陣容。最後紅魔只踢了半場好波，下半場球員冇晒力，中後場又傷多兩件；被熱刺圍攻，保到1分偷笑了。
元旦日，曼聯如果仲用呢個陣容，作客快車期已連捷嘅史篤城，點讓半/一？莊家早開盤，快取硬淨史軍[+1]。明年再見，祝波友繼續贏到笑！文：波神
識睇，一定係睇足英台【英波Live】：
http://soccer.appledaily.com
http://bit.ly/engballlive