跟紅頂白是趨勢投資的戒條，滬綜指今年爆升五成，以為押注中資股無錯，表現卻跑輸幾條街，令人氣餒。H股甚至不跟A股走，已經不是估值或質素的問題，而是兩批人在兩個市場各自出招的結果。
A股市場有「兩」多，人多及錢多，已經不是大戶能夠控制。另一邊廂，機構投資者做莊的港股，散戶不成氣候，對A股亢奮表現異常冷漠。
惠理賺表現費好襟計
明年選一隻心水股，筆者揀惠理（806），懶得嚟又交到功課，賣點有三個。由金手指謝清海掌舵的惠理基金，成立逾20年，資產管理規模達到126億美元，接近千億港元，今年淨增23億美元或22%。
基金收入來源主要有三項：管理費、認購費及表現費。管理費只夠燈油火蠟，要穩定則靠新錢的認購費（最高5%），至於要贏大錢，則要靠15%的表現費食糊。惠理表面上有多個基金，但旗艦價值基金規模達110億美元，佔比近九成。單睇價值基金表現，幾可判斷成績好壞。
目前價值基金分佈，A股投資佔29%，H股佔23%，港股佔22%、紅籌及中國B股則有14%及10%。明年A股繼續癲，惠理持有近四成A、B股可受惠，假如H股及紅籌終肯追落後，惠理亦不會蝕章。價值基金十大持股，只有聯通（762）及中石油（857）較弱雞，其餘完全突顯金手指的威力，升幅超四成有六隻。
截至上周三，價值基金今年累升逾8%，遜於H指11%，但跑贏恒指2%。公司要賺15%表現費，先決條件是單位資產淨值見新高。本月有關單位NAV已錄新高，表現費袋袋平安。上次賺大額表現費為2010年，當年錄逾7億元表現費，當時資產規模為79億美元。四年後的今日，資產規模增六成，表現費肯定超10億元。
2011年1月上旬，惠理股價見8.56元新高，恒指約處於24000水平（現為23773）、H指處於13000（現為12019）、滬綜指處於3000（現為3168）。
目前指數與當年高位相若，股價卻落後超過兩成，況且資產管理規模及基金表現亦遠勝2010年，要揀懶人股，惠理明年睇9元不過份。
利益申報：筆者重倉惠理
王昇
https://www.facebook.com/stockwing1
本欄逢周二刊出
