𡃁模有乜嘢習慣性動作呢？嗱，八方嘅年紀同身材，雖然都同𡃁模有一段距離，但都估到佢哋嘅喜好，例如逢任何活動都擺pose影相放上fb慰粉絲，相信都係指定動作。最近有位𡃁模因為想「做善事」時都影相嘅問題，同香港社區組織協會（SoCO）開拖吵大鑊。
SoCO噚日突發聲明，話互聯網近日流傳一則消息，有少女報稱被SoCO無理對待，內容不實所以要澄清。原來佢哋有位社工23號晚收到一男子來電，話希望安排翌日向露宿者派30個飯盒同60張毛氈，社工叫佢參加即晚同類活動不果，其後一男士再致電表明係一女模特兒嘅經理人，𡃁模繼而喺電話話佢買畀露宿者物資嘅善款係嚟自個人寫真集嘅收益，要求派物資時安排攝影師拍照，以便有相向捐款人交代。
社協指要保障露宿者
社工即時澄清，捐助行動唔會附帶拍攝受捐贈露宿者嘅條件，𡃁模卻堅持攝影師同行，又話會先徵得露宿者同意先影，SoCO覺得唔適合所以拒絕，重申係從保障露宿者福祉嘅立場出發。有SoCO中人私下話，呢位𡃁模抽水成份居多，本想不了了之，估唔到佢仲周圍講，唔回應唔得。到底呢位𡃁模係邊位？登登登凳，原來叫做Meow Lo。講咗都唔識，八方發現佢真係出過寫真集、亦喺23日於fb留言，鬧爆SoCO屈佢做咁多嘢只係為張相，呼冤稱只想做善事啫，SoCO做乜連露宿者聚集地址都唔肯提供？莫非呢位𡃁模pure到唔知唔少天橋底都有露宿者？
李八方
mailto:[email protected]