財經事務及庫務局局長陳家強家有筍盤！陳家強噚日罕有帶埋兩位公子入馬場食飯兼睇馬仔，大仔陳漢唐（David）今年初結咗婚，大家唔使諗㗎嘞，不過，原來廿幾歲嘅細仔Chris都好得喎，外表俊朗，身形唔錯，唔知有女友未呢？
陳家強上星期放假，但係冇外遊，只係留港消費，原因好簡單，咪就係因為大仔David趁聖誕節專登帶埋韓籍太太Dina Shin返港陪父母囉。陳家強27歲嘅大仔David今年3月娶老婆，兩人都係從事金融業，佢哋婚後留喺美國工作，今次係專登返港陪父母過聖誕。
細仔Chris兩年前先至大學畢業，佢同陳家強一樣，都係美國芝加哥大學高材生，同樣主修經濟。細仔畢業後留港工作，聞說都係從事金融業，女生留意喇。