近年久唔久都會聽到「炒股唔炒市」的說法，只要選對股票去炒，不用理會大市走勢。恒指長期於區間上落，以今年為例，至今全年高低波幅只有4,225點，相比百多隻個股閒閒哋逾倍的波幅，後者確實是吸引得多。更重要的是，每逢港股成交暢旺，形成升市格局，就有巨無霸新股排隊上市，並且去到「抽到水塘也乾了」才罷休，結果就係港股常被抽乾，並大落後於美股及A股。
兩隻「差到好」的股票
可是，大市及個股分家真的行得通嗎？11月底起個股下跌比例趨升，大市主要依靠中資金融股支撐，至12月初該板塊失手時，恒指兵敗如山倒，從24189插至22529才找到支持，大股稍好，中細股則不堪一擊。而大市走弱時，會增加短線炒家顧慮，擔心市散個股會跟散，既然股市成日有得炒，忍一忍手又無妨。如是者，跌市時，連個股買盤力量亦消散得很快，直至估值水平吸引到一班中長期投資者入市，中期支持位才出現，因此市股炒作，永遠也不能分家。上周提到要等恒指出一支陰燭測試市底實力，才再考慮炒市，而上周二已出陰燭，如再升破23509點，做一支陽燭，短線目標可睇遠啲，去到24300以上。個股方面，長假期前後，炒友戰意不高，我覺得如無特別心水，可集中精力炒市。
如果係要炒股，我情願炒無人炒的概念，過去兩年，本地電視業風雲再起，先有通訊事務管理局就發新免費電視牌照，惹來爭議，後有小米盒子殺入本港，搶走唔少電視廣播（511）嘅「慣性收視」，再有王維基嘅港視（1137）透過OTT廣播模式開台，最近就係高院委專責清盤項目嘅德勤合夥人任亞視經理人。一連串嘅衝擊下，電視廣播股價從去年62.9元高位，一路潛水至上月42元水平才再見支持，途中反彈幅度只有一兩成左右。而我就係上周二入市一博，亦在facebook上通知大家，主要原因係，呢隻股票沉寂咗好耐，突然間有正面消息，值得炒吓。不過陳國強入主後，我覺得佢唔會花大量時間同心神去經營，反而以他玩財技嘅往績做參考，未來隻股票都係以炒格為主，我相信有好多寶藏會陸續被掘出來，而且內地文化產業谷得咁盡，唔知電視廣播會唔會有日被納入其中，炒埋一堆，暫時目標價係48元沽一半，剩低就擺吓囉。
另一家值得留意嘅本地大企業係新地（016）。它旗下的商住物業，一直以品質優秀見稱，受到本地用家及投資者追捧，定價能力較強。但受家族爭產及許仕仁案影響下，股價走勢一直強不起來，但上周許仕仁案判決一出，雖然郭炳江罪成判監五年，但郭炳聯無罪釋放，可坐鎮董事局，投資者終可放下心頭大石，股價亦連升數天，我覺得未來數月估值有機會向上重估，造就一段升勢。戰友們混沌的2014年將過去，相信新秩序將於2015年來臨，記得充夠電迎接新挑戰。祝新年快樂！
張士佳
註：筆者持有電視廣播股份。