澳門入境黑名單令到唔係個個香港人都可以過大海過聖誕，之前已經預告過會同太座到澳門叉叉電嘅訊匯行政總裁沈振盈（沈大師）就冇呢個煩惱嘞。不過成功過境嘅沈大師今次係賭場冇斬獲，「搵返啲使費」嘅目標落空，但一樣玩得開心。
舊年聖誕同樣係澳門過嘅沈大師，今年同樣喺平安夜出發到澳門，星期六先回港，玩足四日假期，指定動作當然係入賭場。
大師噚日話，自己一向都係小注怡情，主要玩吓骰仔同百家樂，不過今次就冇上年聖誕賺到使費咁好彩嘞，「不嬲我嘅目標都只係想搵返啲使費，不過今次冇贏冇輸，船飛酒店錢都係要自己出番」。
不過，聖誕節又唔一定要熱熱鬧鬧先開心嘅，啱啱喺澳洲叉完電返嚟嘅基金經理黃國英（Alex），反而揀咗去行山唞吓氣過聖誕節，輕輕鬆鬆咁反而仲開心。