內地股市12月大升大跌，至今指數上確實有唔少進賬，但究竟強國股民喺呢輪指數升勢之下，係贏錢定輸錢呢？暫時未有一個正式統計，不過，從媒體報道用字上，可能會有啲眉目。
根據中國上市公司輿情中心統計的資料顯示，今個月截至25號，網絡上新聞標題出現多嘅係「牛市」，報道連同鏈結有36,000幾條。
不過，呢啲標題中，仲有好多唔同嘅「牛市」分類，其中同時出時「牛市」同「踏空」亦有457條，同時出現「牛市」同「跌停」嘅有156條； 同時出現「牛市」同「套牢」亦有106條，似乎喺呢個「牛市」強國股民都唔係牛得太高興。
近期股壇潮語「滿倉踏空」更曾出現喺3,125條新聞標題或鏈結上，其餘仲有嘅詞彙係「漲停跑輸」，「只賺指數不賺錢」。
甚至有股民話：「好不容易在熊市賺點錢，在牛市全虧出去！」「大家再堅持一下，把牛市挨過去就好了……」啲股民講到好似深受其害咁。
講到底，最終埋單計數係贏係輸只有佢哋自己最清楚。不過，可以見到嘅係，近期A股指數上上落落已經接通咗強國股民嘅心情，成為股民情緒心電圖。
李可強