水晶宮知錯喇，普利斯快啲返嚟啦！水晶宮班高層季前唔肯開水喉買人，激到當時領隊普利斯辭職，結果半季後球隊成績大插水，董事局追悔莫及，家陣想求普利斯回巢救亡。
上周五水晶宮主場對修咸頓，我求大俠仲諗住佢哋可以靠主場之利，同修頓周旋吓，點知最後輸1:3。對水晶宮球迷嚟講，或者成場波最滿意嗰部份，可能係半場休息嗰陣，球會派聖誕啦啦隊出嚟娛賓。不過，睇女呢啲嘢真係高興一時，之後見到球隊輸波，水晶宮由球迷到高層都震怒。上周六，董事局決定解僱禾諾克，佢哋成為今季英超首支炒領隊嘅球隊。英國《太陽報》披露，以主席派利殊為首嘅董事局好後悔季前激走普利斯，搞到隊波沉晒。派利殊希望求普利斯大人有大量，返嚟水晶宮執手尾！
高層冇心搞嬲到劈炮
不過，唔知普利斯係堅嬲定想擺架子，佢放風話唔想返水晶宮。消息人士咁講：「普利斯喺水晶宮有過一段好日子，佢亦以呢段執教生涯自豪，但佢家陣想尋求另外一啲機會。」普利斯上季教水晶宮，勝在四平八穩，以第11位完成賽季，佢就好有雄心，希望球會今夏幫佢買舒維爾、基菲爾施古臣同哥爾卡返嚟，但高層唔知孤寒定無能，一個都買唔到，結果激走普利斯，由禾諾克接手。再睇skyBET嘅賠率，下任水晶宮主帥嘅大熱竟然係紐卡素嘅柏度，得兩倍，次熱係3.75倍嘅舒活，而普利斯有9倍。
識睇，一定係睇足英台【英波Live】：
http://soccer.appledaily.com
http://bit.ly/engballlive