季陶不見了，變咗花生友；因乜解究？唔通季陶另覓高就？嗱，季陶粉絲毋須「恐慌」係白色恐怖。是咁的。季陶今日起搬至政治版，周一至五繼續同大家拆解政圈時局同秘聞，原有八方版嘅地盤，就交畀花生友笑盡政圈熱話，大家唔使擔心新仔上場會有三把火，搞到大家惶惶不可終日喎，花生友名副其實食住花生等睇戲，小二，來一客花生！
根據最新花生指數，排頭幾位包括學聯秘書長周永康到底禍從口出、抑或唔覺意講咗心底話？事緣佢日前接受有線電視訪問時話喎，11月30日嘅升級行動係「畀一啲期望升級為主嘅人見到，呢種行動未如理想」，點知訪問出街冇耐就俾各界狂轟，網上花生友仲笑笑口話，怪唔得學聯嗰日齋出口唔出腳啦！群情洶湧，搞到周永康都要急急道歉話，唔係咁嘅意思囉。
多啲包容細路仔
作為花生友，梗係重戲味多過立場，花生友向政界唔同厚多士八卦過，有人私下證實，其實周永康喺內部會議講過類同說話，而且呢，有線原文直播，其實都好演繹到佢嘅神緒吖，咁都叫不擅辭令？但有政界中人就叫大家咪咁mean，話晒佢哋都係細路仔，應該多啲包容喎。
花生友仲八到，有啲學聯中人為清場安排唔多like泛民，原來佢哋當中有人覺得泛民喺佔鐘區清場嗰日，神情輕鬆又玩自拍，老練到好似同班差佬夾定做騷，相反佢哋有啲人當日誠惶誠恐，擔心被捕後係咪即時落案？唔知呢啲係咪老薑同小學雞嘅差別呢？
花生友