信義玻璃（868）主席李賢義上星期五晚喺Boxing Day嫁女，寶貝女李培埡喺灣仔君悅酒店擺酒。風水師麥玲玲唔知係咪幫過主人家睇風水呢，還是主人家見佢最近出現喺大台劇集，夠人氣，搵佢去搞吓氣氛？佢都係座上客，佢上台同主人家合照嗰陣，仲引嚟好多賓客幫手影相，放埋上網㖭呀。
李賢義原本只係一位普通嘅上市公司老闆，直至兩年前，佢親家張高麗躋身中共政治局常委，連帶佢都人氣急升。
查實李賢義個仔李聖潑娶咗張高麗嘅養女張曉燕都有13、14年，如果唔係張高麗成為政治局常委，都未必會被人挖出嚟講。
話時話，內地有錢人結婚，好多時新娘子兩隻手都戴滿金器，戴埋大大塊金豬牌，李培埡呢套衫同配飾都算係簡單嘞。