撰寫緊新一份財政預算案嘅財爺曾俊華，噚日忙裏偷閒出席2014沙田節少年棒球邀請賽決賽開球禮，仲親自落場，去同球員試玩一局。
八方知道財爺西洋劍術了得、功夫亦耍家，但估唔到原來連棒球都唔失禮，落場不但有姿勢仲有實際，一擊即中，開心到舉晒手，全程笑笑口。
見證「沙燕隊」成立
至於參賽嘅小朋友，仲拎住棒球同毛巾搵曾俊華簽名，唔講唔知，原來財爺係咁受小朋友歡迎。
財爺又借啲意講起那些年，佢話自己加入政府第一個崗位就係出任沙田助理政務專員，見證住全港第一支華人少年棒球隊「沙燕隊」嘅成立，為咗紀念呢件事，政府仲將沙田橫跨城門河其中一條橋命名為「沙燕橋」。
不過，財爺噚日只談風月不談政事，一被記者問到預算案準備情況就三緘其口，繼續做鍵盤戰士，透過網誌發表對公共財政嘅睇法。