1000米直路賽幾時都係外檔馬着數，呢日第三場四班此程，開出熱頭冷腳，樂壇天后陳慧琳老竇陳崇偉之團體馬姚廐「鑽石巨匠」第三次出賽，加面箍除眼罩，不再死搶，排12檔之下，陣上後發先至，以大超班姿態彈離近兩身位，大熱3.2倍開齋，帶挈姚本輝同郭能同樣連續第三戰有馬贏，至於二、三名「有盈加瑪」同「幸運戰略」分別排11同14檔，加埋跑第四係10檔馬「大收成」，頭四名全由外檔馬包辦。
不過大家未必估到今場大熱門行頭，連贏會有386蚊咁好分，要多得韋達隻21倍冷門「有盈加瑪」最後一步追過第三熱門「幸運戰略」；反觀「幸運戰略」繼續跑第三贏唔到，季內七戰五P，馬主認真冇運。
陳崇偉穿啡衫、戴住副啡色太陽眼鏡到場拉頭馬，在凱旋門不斷與其他團體成員互相祝賀，顯得非常開心，賽後他拿出幾張彩票，其中一張用「鑽石巨匠」做膽，拖九匹配腳中Ｑ，每注50元，扣本後贏了1480元；另一彩票竟用落第的「發盈喜」做膽買Ｑ，亦是一拖九腳，每注20元，180元本錢全輸掉。
姚本輝說：「『鑽石巨匠』致勝關鍵是加了面箍，中段跑來懂得放鬆留力，反映此配備起了很大作用。牠只有三歲仍很年輕，暫時會主攻直路賽，全熟後可以向1200、1400米進發。」